Job 15

Impendulo ka-Elifazi

1Wasephendula u-Elifazi umThemani wathi:

2“Kambe indoda ehlakaniphileyo ingaphendula ngeze nje loba igcwalise isisu sayo ngomoya otshisayo wempumalanga na?

3Ingadaza inkani ngamazwi angatsho lutho, ngezinkulumo ezingelasisindo na?

4Wena uze uxukuxe inkolo kuNkulunkulu uphazamise lokumkhonza.

5Isono sakho sikhuthaza umlomo wakho; usuthethe ulimi lwamaqili.

6Umlomo wakho yiwo okulahlayo, hatshi owami; izindebe zakho zifakaza ububi bakho.

7“Nguwe yini umuntu wokuqala ukuzalwa na? Wabakhona kuqala kwezintaba na?

8Uyawulalele yini enkundleni kaNkulunkulu? Nguwe wedwa yini olokuhlonipha?

9Kuyini okwaziyo wena thina esingakwaziyo? Ulemibono bani wena thina esingelayo?

10Izimpunga lamakhehla bavumelana lathi, amadoda amadala kuloyihlo.

11Izinduduzo zikaNkulunkulu kazikwanelisi yini, amazwi akhulunywa kamnandi kuwe?

12Kungani uvumela ukufuqwa yinhliziyo na, kungani amehlo akho eqwayiza,

13uze ubhodlise ulaka lwakho kuNkulunkulu ukhihlize amazwi anjalo ngomlomo wakho?

14“Umuntu uyini ukuthi abe ngohlanzekileyo na, lozelwe ngowesifazana ongaba ngolungileyo?

15Aluba uNkulunkulu engazithembi izingilosi zakhe, aluba lamazulu engathembekanga kuye,

16pho umuntu-ke ongcolileyo, oxhwalileyo, onatha ububi njengamanzi!

17“Lalela kimi ngikuchazele; wothi ngikutshele esengakubonayo,

18lokho osekwafakazwa yizihlakaniphi, bengafihli lutho abaluthatha kubokhokho babo

19(abayibo kuphela abaphiwa ilizwe njalo akwaze kwedlula umuntu wezizweni phakathi kwabo):

20Ngezinsuku zakhe umuntu omubi uhlutshwa yizinhlungu, kube yisihluku seminyaka yonke ayibekelweyo.

21Imisindo eyesabisayo iyagcwala ezindlebeni zakhe; nxa kusithi kuyalunga, izikliwi zimhlasele.

22Ulahlekelwa lithemba lokuwuphepha umnyama; umiselwe inkemba.

23Uyantula nje abe yikudla kwamanqe; uyazi ukuthi usuku lobumnyama selusondele;

24Usizi lobuhlungu emoyeni bumlethela uvalo; kuyamgabhela, njengenkosi isilungele ukuhlasela,

25ngokuba efumbathele uNkulunkulu inqindi, ezimisela ukulwa loSomandla,

26aqholoze amhlasele ngesihlangu esiqinileyo esilohlonzi.

27“Lokuba ezimuke ubuso bungakaya, ekhithika umkhaba uthe khu,

28uzahlala emadolobheni angamanxiwa lezindlini ezingahlali muntu, izindlu eziwohlokayo zibe yinqumbi.

29Kasayikunotha futhi, lenotho yakhe kayiyikuma, lezifuyo zakhe kazisayikugcwala ilizwe lonke.

30Kayikuphepha emnyameni; ilangabi lizabunisa amahlumela akhe.

31Makangazikhohlisi ngokuthemba okuyize, ngokuba akazukuzuza lutho ngakho.

32Singakapheli isikhathi sakhe uzajeziswa, lezingatsha zakhe kaziyikuhluma.

33Uzaba njengevini eliphundlwe izithelo zalo zingakavuthwa, njengesihlahla se-oliva sikhithiza izimpoko zaso.

34Ngoba ixuku labangelaNkulunkulu kalizukuba lezithelo, lomlilo uzawahangula amathente alabo abathanda isivalamlomo.

35Bamitha uhlupho bazale ububi; isizalo sabo sibumba inkohliso.”